افغان کرکټ بورډ په يوه خبر پاڼه کې ويلي، افغان کرکټ ملي لوبډله به د زمبابوې په کوربه توب سبا پنجشنبه د (ډيسمبر ۲۶) د دوه ټسټ لوبو لړۍ پيل کړي.
د دغې لړۍ لومړۍ لوبه به د کابل پر وخت د ورځې ۱۲:۳۰ بجې پيل شي.
دغه لړۍ داسې مهال پيليږي چې افغان کرکټ ملي لوبډلې له زمبابوې د شل اوريزه او يو ورځنيو لوبو لړۍ هم ګټلې دي.
کرکټ بورډ دغه راز ويلي، الله محمد غضنفر هم د ټسټ سکواډ برخه ګرځېدلی او په راتلونکو لوبو کې به ولوبیږي.
افغان لوبغاړي د لوبو په موخه زمبابوې ته رسېدلي دي او تمرينات يې ترسره کړي دي.
باید ياده شي چې الله محمد غضنفر، صديق اتل، عصمت عالم او ځيني نور لوبغاړي به په لومړي ځل ټسټ لوبه ترسره کړي.
