د فغانستان د کرکټ د ملي لوبډلې لوبغاړی ګلبدين نايب د هند په سوداګریز لیګ IPL کې د لوبېدو لپاره له ډهلي کپيټل لوبډلې سره يوځای شوی دی.
هغه تېره شپه پر خپله اېکسپاڼه لیکلي چې دغه ستر تجارتي ليګ کې يې لوبېدل يوه هيله وه او د ښو لوبو په تمه دی.
ورته مهال، د هند د کرکټ تجارتي ليګ لوبډلې ډهلي کپيټال پر خپله فېسبوکپاڼه د نايب د عکس په خپرولو هغه ته ښه راغلاست ويلی او ليکلي یې دي: «افغان ځواک اوس د ډهلي کيپټال يوه برخه ده.»
ټاکل شوې نايب له يادې لوبډلې سره د الرونډر مچ مارش پرځای ولوبیږي. د ډهلي کيپټال روزونکي ريسکي پاينټنګ د مارش له څلورو لوبو وروسته د هغه د ټپي کېدو خبر ورکړ.
۳۱ کلن ګلبدين نايب ښي لاسی الرونډر دی چې تراوسه یې د افغانستان په ګټه ۵۷ نړۍوالې شل اوريزې لوبې ترسره کړي، ۶۱۸ منډې او ۲۲ ويکټې يې اخيستي چې په يوه لوبه کې يې د ۵۷ منډو جوړول تر ټولو ښه کارکردګي وه او وروستی لوبه يې په ۲۰۲۳ کال اکتوبر مياشت کې د هند په وړاندې ترسره کړې ده.
په هند کې ترسره کېدونکي ستر تجارتي ليګ کې له نايب وړاندې نهه نور افغان لوبغاړي هم اخيستل شوي دي.
د سږني پړاو دغو سياليو کې رحمان الله ګربز، مجيب الرحمان او غضنفر د کوکلتې، راشد خان، عظمت الله عمرزی او نور احمد د ګجرات ټايټنز، محمد نبي د ممبۍ انډينيز، نوین الحق د لکناو سوپر جاينټ او فضل الحق فاروقي د سنرايزر حيدر اباد لوبډلې په ګټه لوبېږي.
محمد نبي او ورپسې راشد خان دوه لومړني افغان لوبغاړي و چې په ۲۰۱۸ ای پي ال کې ولوبېدل او له هغه وروسته نورو افغان لوبغاړو هم ورته لار پېدا کړه.
