خبریال: فرمان الله زبیرزی
د ترکیې ولسمشر رجب طیب اردوغان خبر ورکړ، چې د جنورۍ په ۵مه (د دوشنبې په ورځ) به د امریکا له ولسمشر ډونالډ ټرمپ سره تلیفوني اړیکه وکړي او د یو شمېر مسایلو په اړه به خبرې وکړي، چې پکې د اوکراین د کړکېچ حل او د اوربند په تړاو خبرې شاملې دي.
اردوغان ترکي رسنیو ته ویلي، د دوشنبې په ورځ به له ټرمپ سره تلیفوني خبرې وکړي او پکې به د فلسطین مسله، د روسیې او اوکراین مسله وڅیړي.
نوموړی زیاتوي، د ترکیې د بهرنیو چارو وزیر، حاقان فیدان، به په هغه ناسته کې برخه واخلي، چې د اوکراین په اړه د "د دوست هېوادونو ائتلاف" تر چتر لاندې د فرانسې په پلازمېنه پاریس کې ترسره کېږي.
