کابل (کوه نور، ۴ جدي ۱۴۰۴): د پاکستان د لومړي وزیر مرستیال اسحاق ډار ویلي، د پاکستان بنسټ ایښودونکي محمد علي جناح د زوکړې ورځ د عيسويانو له ورځې سره ګډه نمانځو.
ډار ویلي، زموږ مسیحي وروڼو او خویندو د تعلیم، روغتیا، ملي خدمت او د پاکستان د دفاع په برخه کې يې مثاله خدمتونه کړي، هغوی تل د خپل وطن سره ریښتینی وفاداري ښودلې او د هېواد د پرمختګ لپاره یې نه ستړې کېدونکې هڅې کړي دي.
هغه زياته کړې، دا ورځ نه یوازې زموږ د مسیحي وروڼو او خویندو لپاره یوه ځانګړې مذهبي ورځ ده؛ بلکې د ټول هیواد لپاره هم یوه مهمه او ارزښتناکه ورځ ده، ځکه دا د یو داسې رهبر د زېږېدو ورځ ده چې د پاکستان د جوړېدو خوب یې تعبیر کړ.
هغه زیاته کړې، کريسميس د سولې، زغم، قربانۍ او بشریت سره د مینې نښه ده او پر وینا یې، چې دا ورځ موږ ته د هغو ارزښتونو یادونه کوي، چې قائد اعظم یې د پاکستان د جوړولو لپاره بنسټ وګرځاوه.
د نوموړي پر وینا، د اسلامي تعلیماتو سره سم، د کريسميس ورځې نمانځل زموږ د ټولنې د یووالي او پرمختګ ضامن دي.
