کابل (کوه نور، ۷ سنبله ۱۴۰۴):
له سلګونه ورځو جګړو وروسته ګڼ شمېر اسرایلي ریزرف شويو سرتېرو نور دندې ته له حاضرېدو انکار کړی او یو شمېر نور بیا د دا ډول جګړې ګډون ردوي، چې نور پرې باور نه لري.
د نړۍوالو رسنیو د راپورونو په اساس، اسرایلي حکومت د غزې ښار پر ضد د پوځي یرغل لپاره د لسګونه زرو ریزرف شویو سرتېرو د راټولولو تیاری نیسي؛ خو پوځي چارواکو یې ویلي، روښانه نه ده، چې له نږدې دوو کلونو جګړې وروسته به څومره سرتېري بېرته جګړې ته ستانه شي.
نیو یارک ټایمز د اسرایلو د پوځي چارواکو له قوله خبر ورکړی، چې په دې وروستیو میاشتو کې د هغه اسرایلي ریزرف شویو سرتېرو شمېر کې په پراخه کچه ډېروالی راغلی، چې له دندې غایب پاتې شوي دي.
د نیویارک ټایمز په راپور کې راغلي، ځینې ریزرف شوي سر تېري یې د ستړیا ترڅنګ د ګډ ژوند د ژغورلو او یا د زیانمنو کارونو څخه د ځان ساتلو اړتیا یادوي او یو شمېر نور بیا وایې، دوی ورځ تر بلې له جګړې ستړي او ور څخه ناهیلي شوي دي.
په همدې حال کې د اسرایلو حکومت د ۶۰ زره نورو ریزرف شویو سرتېرو د راغوښتلو او د ۲۰ زرو د دندې د غځولو خبر ورکړی دی.
د یادونې وړ ده، چې اسرایلي سرتېري پر غزې سربېره د جنوبي لبنان او سوریې په ځینو برخو کې ګزمې وهي او همدارنګه په لوېدیځ کې پر فلسطیني ښارونو غټ غټ بریدونه ترسره کوي.
