کابل (کوه نور، ۲۹ عقرب ۱۴۰۴): د ایران د بهرنیو چارو وزارت ویاند، اسماعیل بقایي، د اسراییلو هغه بریدونه غندلي، چې په جنوبي لبنان کې ترسره شوي او د فلسطیني کډوالو د وژل کېدو او ټپي کېدو لامل شوي دي.
د ایران د بهرنیو چارو وزارت پر خپله اېکس پاڼه کې په خپره شوې اعلامیه کې ویلي، چې دا بریدونه د ملګرو ملتونو د منشور او نړۍوالو قوانینو ښکاره سرغړونه ده.
بقایي ویلي، اسراییل د ۲۰۲۵ کال د نوامبر اوربند په مکرر ډول نقض کړی، او ټینګار یې کړی، چې د امریکا متحده ایالات د اسراییلي رژیم د بریدونو د دوام اصلي مسوول دي.
د ایران د بهرنیو چارو وزارت له ملګرو ملتونو او نړۍوالې ټولنې غوښتي، چې د اسراییلو بریدونه ژر بند کړي او عاملین یې محاکمه کړي.
د رویټرز د راپور له مخې، په دې وروستیو بریدونو کې ۱۳ تنه فلسطیني کډوال وژل شوي، چې د لبنان د روغتیا وزارت هم دا خبر تأیید کړی دی.
