د رياست الوزرا مقام پرېکړه کړې، چې له دې وروسته دې هېواد ته هېڅ ډول پخه او خامه مالګه نه وارېدېږي.
د خوړو او درملو ملي ادارې ويلي، له دې وروسته هېواد ته د هر ډول مالګې واردات په مطلق ډول بند دي.
د يادې ادارې د خونديتوب عمومي رييس ډاکټر نعيم الله ايوبي ويلي، دغه پرېکړه په هېواد کې د مالګې په برخه کې د ځان بسياينې په موخه شوې.
هغه ويلي، په کلني ډول افغانستان ته ۳۰۰ټنه مالګه واردېږي، چې ۱۶۰ يې د خوراک او ۱۴۰ يې د صنعت په برخه کې استعماليږي.
د کانونو او پټروليم وزارت د معلوماتو له مخې، افغانستان په کلني ډول د ۴۹۲ ټنه مالګه استخراجيږي، چې د هېواد اړتيا پوره کولای شي.
د يادونې وړ ده، چې څو ورځې وړاندې هم په کابل کې د ۵ مليونه افغانيو په ارزښت د مالګې د پروسس يوې فابريکې په کار پیل وکړ.
