د امريکا د بهرنيو چارو وزارت په هغو څلورو شرکتونو بنديزونه ولګول چې د پاکستان بالسټيک توغنديو ته يې مواد برابرول.
ياد وزارت د خبرپاڼې په خپرولو سره ويلي، دغه اقدام یې له دې امله کړی چې د توغنديزو او ويجاړوونکو وسلو مخه ونيسي.
دغه راز، هغه شرکتونه چې بنديز پرې لګېدلی، يو يې په بېلاروس کې د مینسک په نوم د تراکتور د ټایرونو د جوړولو شرکت دی او درې نور يې په چين کې د ګراينيټ، تیانجین نړۍوالې سوداګرۍ او شيان لارنج په نوم د ټکنالوژۍ د پرمختګ شرکتونه دي.
له دې سره سره، د يادو شرکتونو پر مالکانو او هغوی چې ۵۰ سلنه سهم په کې لري، هم بنديز لګېدلی دی.
اعلاميه کې ويل شوي، دغو شرکتونو د پاکستان بالسټيک او مزايل جوړولو ادارې « FISI » ته مواد، ټکنالوژي او امکانات برابرول.
تراوسه د پاکستان حکومت او يادو شرکتونو د امريکا د دغه اقدام په اړه څه نه دي ويلي.
