امریکا: سوریه کې مو ایراني تاسیسات په نښه کړل

د امریکا دفاع وزیر ویلي، په سوریه کې یې د ایران اړوند تاسیساتو باندې دوه هوایي بریدونه کړي دي.
د امریکا دفاع وزیر لوېډ اسټن ویلي، چې دا بریدونه د یکشنبې په شپه د سوریې البو کمال ښار سره نږدې د روزنې په یو مرکز او د میادین ښار سره نږدې د پټېدو په یو خوندي کور شوي دي. 
د اسټین په خبره، د دغو بریدونه امر ولسمشر جوبایډن ورکړی و. 
دا بریدونه د ایران اړوندو ملېشو له خوا په سوریه او عراق کې پر مېشتو امریکايي ځواکونو د وروستیو بریدونو په ځواب کې شوي.  
بل لورته تهران تر اوسه په دې اړه کوم غبرګون نه دی ښوودلی.