کابل (کوه نور، ۲ لیندۍ ۱۴۰۴): رویټرز خبري آژانس ویلي، د متحده ایالاتو حکومت به په راتلونکو ورځو کې په وینزویلا کې د عملیاتو نوې مرحله پیل کړي؛ ترڅو د دغه هېواد پر ولسمشر نیکولاس مادورو فشار ډېر کړي.
رویټرز د شنبې په شپه د خپلو سرچینو له خولې راپور ورکړی، چې د دغو اقداماتو لومړۍ برخه ښايي پټه عملیات وي؛ خو تر اوسه د هغو عملیاتو دقیق وخت نه دی معلوم شوی.
له بلې خوا، سپینې ماڼۍ او پنټاګون تر دې دمه په دې اړه له تبصرې کولو ډډه کړې ده.
د راپورونو له مخې، مادورو، چې له ۲۰۱۳ کال راهیسې په وینزوېلا هېواد کې واکمن دی، څو ځله یې ویلي، چې د وینزویلا خلک او پوځ به د امریکا د هر ډول اقدام پر وړاندې مقاومت وکړي.
باید وویل شي، چې دغه اقدامات داسې مهال ترسره کېږي چې واشنګټن هڅه کوي د «سولیس» کارټل د یو بهرني ترهګریز سازمان په توګه اعلان کړي.
