کابل (کوهنور، ۹ اسد ۱۴۰۴):
په انګولا کې د ډیزلو د بیې ناڅاپي لوړوالي پراخ غبرګونونه راپارولي، چې له امله یې تر اوسه ۲۲ تنه وژل شوي او نږدې ۱۹۷ تنه نور ټپیان شوي دي. دا مظاهرې، چې له څو ورځو راهیسې دوام لري، د هېواد په بېلابېلو ښارونو کې خپرې شوې دي.
د الجزیرې شبکې د راپور له مخې، د انګولا حکومت څو ورځې وړاندې اعلان وکړ چې د اقتصادي اصلاحاتو په لړ کې به د ډیزلو سبسایدۍ کمې شي، چې له امله یې د ډیزلو بیې شاوخوا ۳۳ سلنه لوړې شوې.
دا پرېکړه د ټرانسپورتي سکتور، مزدورکارانو او عادي خلکو سخت غبرګون را وپاراوه، او لاریونونه پیل شول.
د راپورونو پر بنسټ، مظاهرې په لومړي ځل د پلازمېنې لوانډا په مرکزي ناحیو کې پيل شوې، خو وروسته شپږ نورو ولایتونو ته هم وغځېدې. مظاهرهچیانو د سړکونو بندېدو، د دولتي تأسیساتو د ویجاړېدو، او د عامه شتمنیو د سوځېدو راپورونه ورکړي.
ځایي چارواکو ویلي، چې د مظاهرهچیانو او پولیسو ترمنځ نښتې شوې، چې له امله یې د مرګژوبلې کچه لوړه شوې ده. د امنیتي ځواکونو له خوا د مظاهرهچیانو د تیتولو لپاره اوښکې بهوونکی ګاز، او ځینې سیمو کې حتی د ربړي مرمیو کارول یاد شوي دي.
د بشري حقونو نهادونو د حکومت له چارواکو غوښتي چې د مظاهرهچیانو پر ضد له زور زیاتي ډډه وکړي او د خلکو اندېښنو ته غوږ ونیسي. حکومت تر اوسه د روان کړکېچ په اړه رسمي څه نه دي ويلي.
