ایراني رسنیو راپور ورکړی، چې د دغه هېواد ولسمشر مسعود پزشکیان له اسرایلو سره د جګړې پر مهال له یوې زېرزمینۍ د تښتېدلو په وخت کې ټپي شوی دی.
د ایران حکومتي اژانس فارس راپور ورکړی چې د اسرایلو په ۱۲ ورځینۍ جګړه کې د تهران په لوېدیځ کې هغه ودانۍ په نښه شوې وه چې پکې د حکومت د لوړ پوړي چارواکو په ګډون د دغه هېواد ولسمشر مسعود پزشکیان هم شتون درلود.
په راپور کې راغلي، اسرایلي ځواکونو دې ودانۍ ته د ننوتلو پر شپږ لارو بمونه ورغورځول، چې د بریښنا جریان ورسره قطع شو؛ خو د ایراني چارواکو په ګډون پزشکیان هم د بېړنۍ لارې له کارولو سره له دغه ځایه وتښتېد.
خبرپاڼه کې وړاندې لیکل شوي، له دې ودانۍ د تښتېدلو پر مهال د یو شمېر ایرانیو چارواکو په ګډون ولسمشر مسعود پزشکیان هم د پښې په برخه کې ټپي شوی دی.
