ایراني چارواکو خبر ورکړی چې یاد هېواد کې د افغان کډوالو د سرشمېرنې اسناد باطل ثابت شوي او هغه شمېر افغان کډوال چې قانوني اسناد ونه لري دغه هېواد ورته د چنګاښ تر ۱۵ تاریخه د وتلو وخت ورکړی دی.
د ایران د کورنیو چارو وزارت او د بهرنیو وګړو چارو مشر نادر یار احمدي اعلان کړی چې د افغان کډوالو اسناد نور د اعتبار وړ نه دي او د دغه اسنادو لرونکي افغانان نور د ناقانونه کډوالو په لېست کې شمېرل شوي دي.
احمدي ویلي د افغانانو شپږ ډلې چې د لنډ مهالو کارتونو لرونکي دي په یاد هېواد کې د اوسېدو اجازه لري او نور هغه باید د چنګاښ تر ۱۵ له دغه هېواده ووځي.
د ایراني چارواکو د مالوماتو په اساس دا مهال په یاد هېواد کې ۶,۱ میلیون افغان کډوال ژوند کوي چې ۴,۱ میلیون یې ناقانونه دي.
د دغه هېواد چارواکو همداراز ویلي چې په را روان تعلیمي کال هغه زده کوونکي چې سرپرست یې یواځې د سرشمېرنې اسناد لري په ښوونځیو کې د شاملولو حق نه لري.
