د برېټانیا لومړی وزیر، کېیر سټارمر وایي، که چېرې اسرائیل په غزه کې خپل دریځ بدل نه کړ؛ نو لندن به د ملګرو ملتونو د عمومي غونډې تر پیل مخکې د فلسطین خپلواک دولت پر رسمیت وپېژني.
سټارمر دا څرګندونې په لندن کې د فلسطین د خپلواکې ادارې له مشر محمود عباس سره د لیدنې پر مهال وکړې.
د برېټانیا لومړي وزیر دفتر لیکلي، دواړو لوریو په دې کتنه کې د اوربند ټینګېدو، د یرغمل شویو کسانو د خوشې کېدو او د غزې خلکو ته د بشري مرستو د زیاتوالي پر اړتیا ټینګار وکړ.
ټاکل شوې، چې د ملګرو ملتونو عمومي غونډه د روان کال د سپټمبر په ۲۲ نېټه پیل شي.
