کابل (کوه نور، ۵ عقرب ۱۴۰۴): د امریکا د خزانې وزیر سکات بسنت، ویلي، د ټیکتاک د راتلونکې په اړه وروستۍ موافقه به د امریکا د ولسمشر ډونالډ ترمپ او د چین د ولسمشر شي جینپینګ ترمنځ د لیدنې پر مهال لاسلیک شي.
د یکشنبې په ورځ، له «Face the Nation» شبکې سره په مرکه کې ویلي، چې د دې توافق ټول جزئیات د جنوبي کوریا له سرمشریزې مخکې نهایی شوي دي.
نوموړي زیاته کړې، چې دا موافقه به د اسیا-پسیفیک د اقتصادي همکاریو سازمان "APEC" د غونډې په څنډه کې، د پنجشنبې په ورځ، لاسلیک شي.
د بسنت پر وینا، د دې توافق هدف دا دی، چې د امریکايي شرکتونو په پانګونې سره، د ټیکتاک لپاره یو نوی جوړښت رامنځته شي؛ تر څو د امنیتي اندېښنو مخه ونیول شي.
د یادونې وړ ده، چې ترمپ تېره میاشت یو فرمان لاسلیک کړی و، چې له مخې یې، ټیکتاک یوازې هغه وخت کولای شي په امریکا کې فعالیت وکړي، چې مالکیت یې امریکایي شرکتونو ته انتقال شي.
