خبريال: فرمان الله زبيرزی
د ایران د بهرنیو چارو وزارت ویاند، اسماعیل بقایې په تهران کې یو کنفرانس ته ویلي، چې د ایران توغندیز پروګرام یوازې د هېواد د ځمکنۍ بشپړتیا او ملي امنیت د دفاع لپاره طرحه او جوړ شوی او په دې تړاو له چا سره مذاکرات نه کوي.
بقايي ويلي، د ایران دفاعي وړتیاوې د خبرو اترو یا معاملې وړ نه دي، دا وړتیاوې د هر ډول احتمالي یرغل د مخنیوي لپاره رامنځته شوې دي او هېڅ ډول مداخله پکې د منلو وړ نه ده.
د بقایې پر وینا، نړۍوال د ایران دفاعي توغندیز پروګرام د د ګواښ په توګه انځوروي، په داسې حال کې چې د وژنې او ډلهییزې ویجاړۍ ستر مقدار لرونکي وسلې اسرائیلو ته لېږدول کېږي.
بقایې همداراز ویلي، چې راپورته شوی رسنیز کمپاین د هغې مرکبې جګړې برخه ده چې اسرائیل له اوږدې مودې راهیسې د امریکا او د هغې د رسنیزو شبکو په ملاتړ د ایران پر ضد پر مخ وړي.
