کابل (کوه نور، ۲۱ سنبله ۱۴۰۴): بلاروس د امریکا په منځګړیتوب خپل ۵۲ سیاسي بندیان ازاد کړي، چې له امله یې امریکا له مینسک سره د بندیزونو د نرمولو ژمنه کړې ده.
د بلاروس ولسمشر "الکساندر لوکاشینکو" اعلان کړی، چې د ازادو شویو ۵۲ بندیانو له ډلې ۱۴ تنه یې بهرني وګړي دي.
لوکاشینکو ویلي، د بلاروس له زندانونو یې خپل ۵۲ سیاسي بندیان ازاد او هغوی یې لیتوانیا هېواد ته سپارلي دي.
په همدې حال کې د لیتوانیا ولسمشر "ګیتاناس نوسیدا" د پنجشنبې په ورځ د دې ۵۲ بندیانو د سپارلو خبره تایید کړې او ویلي یې دي، چې بالټیک هېوادونه او بلاروس دواړه د امریکا له ولسمشر ډونالډ ټرمپ مننه کوي، چې د بندیانو د ازادولو په پروسه کې یې مرسته کړې ده.
نوسیدا د پنجشنبې په ورځ ویلي، چې بندیان د امریکا د استازي له پلاوي سره یوځای لیتوانیا ته اړول شوي دي.
نوموړي پر اېکس پاڼه لیکلي، دبندیانو له ډلې هیڅوک بلاوروس کې دي پاتې شوي او پر وینا یې، چې تېره ورځ ۵۲ بندیان د بلاروس له خنډونو، د اوسپنې له کړکیو او د دوامدارې وېرې څخه د خلاصون په هیله د لیتوانیا پولې ته خوندي اړول شوي دي.
بل پلو د امریکا ولسمشر ډونالډ ټرمپ له بلاوروس هېواده مننه کړې او پر یاد هېواد یې د بندیزونو د کمولو کې ژمنه کړې ده.
