د ايراني رسنيو د راپورونو له مخې، نن پنجشنبه د ايران پلازمېنه تهران د حماس سیاسي دفتر د مشر اسماعيل هنيه د جنازې لمونځ د ايران د مذهبي مشر په امامت ترسره شو.
هنيه پرون سهار وختي د ايران پلازمېنه تهران کې ووژل شو.
نوموړی دغه هېواد ته د نوي منتخب ولسمشر مسعود پزشکيان د لوړې مراسمو کې د ګډون په موخه تللی وو.
ايراني چارواکو تراوسه د هنيه د وژل کېدو په تړاو وضاحت ندی ورکړی، خو د دغه هېواد مذهبي مشر ايت الله خامنهاي د هنيه له وژل کېدو وروسته په اسرايلو د بريد امر ورکړی دی.
د حماس د سیاسي دفتر د مشر وژنه د افغانستان، روسيې، ترکيې، سوريې، ايران، پاکستان او ډېرو نورو هېوادونو له لوري وغندل شوه.
هېره دې نه وي چې هنيه به په قطر کې خاورو ته وسپارله شي.
