ڪابل (کوه نور، ۱۸ لیندۍ ۱۴۰۴): تېره شپه د جاپان شمال ختیځ کې د ۷.۵ درجې زلزلې له امله لږ تر لږه ۳۰ کسان ژوبل شوي او زرګونه نور خلک اړ شوي، چې خپل کورونه پرېږدي.
د جاپان د هوا پېژندنې ادارې ویلي، زلزله د شپې ۱۱:۱۵ بجې (د نړۍوال وخت له مخې ۱۴:۱۵) رامنځته شوې، چې ژورتیا یې ۵۰ کیلومتره وه او د آوموري سیمې له ساحل څخه شاوخوا ۸۰ کیلومتره لېرې شوې ده.
د یادې ادارې لخوا په خبره شوې خبرپاڼه کې راغلي، چې د دې زلزلې له امله ځینې رېل خدمات ځنډول شوي او د زرګونو کورونو بریښنا پرې شوې ده.
د دې ادارې مشرانو خبرداری ورکړی، چې ښايي په راتلونکو ورځو کې بله زوروره زلزله هم وشي او له خلکو یې غوښتي، چې لږ تر لږه یوه اوونۍ دې د بلې احتمالي زلزلې لپاره چتوو واوسي.
په همدې حال کې د جاپان لومړي وزیر ساناې تاکایچي له زلزله ځپلو خلکو غوښتي، چې د زلزلو پر وړاندې خپل چمتووالی بیا وڅېړي او د زلزلې د احساس کولو په صورت کې دې سمدواره خپل کورونه پرېږدي.
د رویټرز خبري آژانس پر وینا، د دې زلزلې له امله شاوخوا ۹۰ زره کسانو ته د تخلیې امر شوی دی.
همداراز د آوموري سیمهییز حکومت ویلي، چې شاوخوا ۲۷۰۰ کورونه له برېښنا بېبرخې دي او د ختیځ جاپان رېل شرکت هم د شمال ختیځ ساحلي پټلۍ ځینې خدمات ځنډولي.
د جاپان حکومت د لومړي وزیر د کړکېچ مدیریت مرکز کې د غبرګون دفتر جوړ کړی او له زلزله ځپلیو سره د مرستې لپاره یې بېړنی ټیم ګمارلی دی.
