د جرمني رسنيو د راپورنو له مخې، ياد هېواد غواړي چې په دغه هېواد کې مېشت افغان کډوال د ازبکستان له لارې کابل ته واستوي.
راپورته زياتوي، د جرمني د کورنيو چارو وزارت يوه پلاوي په همدې موخه د ازبکستان پلازمېنې تاشکند ته سفر هم کړی دی.
له دغه هېواد را شړل کېدونکی کډوال به له تاشکند څخه د افغان هوايي شرکتونو په واسطه کابل ته را ولېږدول شي.
له جرمني د افغان کډوالو د شړلو خبره هغه وخت راپورته شوه چې په دغه هېواد کې يو افغان کډوال جرمنی پوليس له دې امله وواژه چې اسلام ته يې سپکاوی کړی وو.
که څه هم د افغانستان د بهرنيو چارو وزارت له جرمني غوښتي وو چې د افغان کډوالو د شړلو په هکله دې له دوی سره خبرې وشي، خو د جرمني حکومت ويلي، نه غواړي چې په دې برخه کې له افغان حکومت سره په مستقيم ډول خبرې وکړي.
