کابل (کوه نور، ۶ دلوه ۱۴۰۴): نړۍوالو رسنیو راپور ورکړی چې د امریکا په مېن ایالت کې یوه شخصي الوتکه چې اته کسان پکې سپاره وو، لوېدلې ده.
اسوشیټېډ پرېس نن دوشنبه، د جنورۍ ۲۶، راپور ورکړی، چې دغه الوتکې د بنګور له هوايي ډګر څخه الوتنه کړې وه، چې تر اوسه د دې الوتکې د سپرلیو د وضعیت په اړه نور جزییات نه دي خپاره شوي.
دا پېښه په داسې حال کې رامنځته شوې، چې د امریکا په شمال ختیځ او د هېواد په ډېرو نورو سیمو کې سخت ژمنی توپان روان دی.
د بنګور هوايي ډګر په یوه اعلامیه کې ویلي، بېړنۍ ډلې د پېښې ځای ته رسېدلي او هوايي ډګر تړل شوی دی.
یاده الوتکه د بمبارډیر چالنجر ۶۰۰ ډول ده، چې یو پراخبدنه سوداګریز جټ بلل کېږي او له نهو تر ۱۱ مسافرو د لېږد وړتیا لري.
