د پاکستان او ايران ترمنځ پر يو بل له بريدونو وروسته د پاکستان د بهرنيو چارو وزير جليل عباس جيلاني د ايران د بهرنيو چارو له وزير حسین امير عبداللهيان سره ټيليفوني خبرې کړي.
د ايران د بهرنيو چارو له وزارت څخه په خپره شوې خبر پاڼه کې راغلي، جیلاني د دواړو هېوادونو ترمنځ د ډيپلوماتيکو اړيکو په بیا ښه کېدو ټينګار کړی.
خبر پاڼه زياتوي، جيلاني له خپل سیال غوښتي ترڅو اسلام اباد ته سفر وکړي.
عبداللهيان په دغه ټيليفوني اړيکه کې ويلي، هېواد يې د پاکستان حاکميت او جغرافيې ته احترام لري.
د يادونې ده، چې څو ورځې وړاندې ايران د پاکستان پر بلوچستان بريد وکړ او اعلان يې وکړ چې په دغه خاوره يې د جیش العدل مرکزونه په نښه کړي.
پاکستان هم په ايران ځوابي بريدونه وکړل.
د دواړو بريدونو قربانيان د ماشومانو په ګډون عام وګړي وو.
