کابل (کوه نور، ۲ سنبله ۱۴۰۴): د ایران د بهرنیو چارو وزیر سید عباس عراقچي سعودي عربستان کې د بهرنیو چارو وزیرانو په ځانګړې غونډه کې د ګډون کولو په موخه یاد هېواد ته تللی دی.
د ایراني رسنیو د راپورونو په اساس، عراقچي د اسلامي همکاریو سازمان د بهرنیو چارو وزیرانو په غونډه کې ګډون کوي.
راپورونو کې راغلي، د دې ناستې مهم موضوعات غزه کې د انساني ناورین څېړنه، د یاد هېواد د بشپړې نیونې حقوقي او سیاسي مسایلو څېړل او د مرستو رسولو لپاره همغږي کول دي.
د یادونې ده چې عراقچي تر دې وړاندې هم بېلابېلو هېوادونو ته سفرونه کړي وو او د اسرایلو او ایران ترمنځ د تاوتریخوالي او د ۱۲ ورځنۍ جګړې په اړه یې د هېوادونو له مشرانو سره خبرې کړې وې.
