د بښنې نړۍوال سازمان ويلي، د خيبر پښتونخوا په بنو کې پر لاريونوالو ډزې د بشر له حقونو سرغړونه ده.
سرچينې دغه راز ويلي، د سولييزو لاريونوالو خلاف بريد د ملګرو ملتونو خلاف عمل دی او د پاکستان حکومت بايد د دې کار پلټنه وکړي.
ياد سازمان دغه راز د پښتونخوا په اکثريت سیمو کې د انټرنټ بندېدل هم غندلي دي.
د پاکستان پوليسو تېره ورځ وروسته له هغه په بنو کې پر لاريونوالو ډزې وکړې چې دوی د پاکستان له لوري د وروستيو عملياتو (عزم استحکام) خلاف لاريون وکړ او له حکومت يې غوښتنه کړې چې په پښتونخوا کې دې دغه عمليات نه ترسره کوي.
د پاکستاني پوځيانو د ډزو په پايله کې له شلو ډېر لاريونوال ټپيان او دغه راز دوه نور ووژل شول.
ورته مهال بيا د پښتون ژغورنې غورځنګ مشر منظور پښتون هم د پښتونخوا په اکثريت سیمو کې د لاريونونو د پراختيا اعلان کړی دی.
