کابل کې د ترکیې سفیر د هرات ته په سفر کې د دغه ولایت له والي مولانا اسلام جار سره لیدلي او پر دوه اړخیزو اقتصادي اړیکو یې ټینګار کړی دی.
نوموړي ویلي، هېواد یې له افغانستان سره په اقتصادي، سوداګریزو، معدني او نورو برخو کې همکاري ته لېواله دی.
هغه زیاته کړې، هڅه کوي، چې افغانستان کې خپلې اقتصادي پروژې ډېرې کړي.
هممهاله بیا د هرات والي د افغانستان او ترکیې ترمنځ د همکاریو په دوام ټینګار کړی دی.
نوموړي ویلي، هرات د ښه جغرافیوي موقعت د لرلو ترڅنګ په زراعتي، اقتصادي، معدني او ترانزيټي برخه کې هم مهم رول لري.
دغه لیدنه کې د ترکیې سفیر د افغان سوداګرو او ناروغانو لپاره د ویزو د اسانتیا ډاډ ورکړی دی.
