کابل (کوه نور، ۱۱ مېزان ۱۴۰۴): د جرمني د هوایي ډګر چارواکو ویلي، تېره شپه د مونیخ هوایې ډګر د ډرون الوتکو د لیدو له امله په لنډ مهالې توګه تړل شوی دی.
دوی په یوه اعلامیه کې ویلي، چې د پنجشنبې په شپه له ۱۰ بجو وروسته پخپل هوایې حریم کې د ډرون الوتکو د لیدلو له امله، ۱۷ الوتنې ځنډول شوې، چې نږدې ۳۰۰۰ مسافر یې اغېزمن کړي دي.
چارواکو زیاته کړې، ۱۵ الوتنې، چې باید مونیخ ته رارسېدلې وای، نورو ښارونو، شتوتګارت، نورنبرګ، فرانکفورت، او د اتریش پلازمېنې ویانا ته اوښتې دي.
د سرچینو د مالوماتو له مخې، د جرمني په جنوبي سیمه باواریا کې موقعیت لرونکي مونیخ هوایې ډګر د روان کال په لومړیو شپږو میاشتو کې نږدې ۲۰ میلیونه مسافرین انتقال کړي دي.
دا هوایي ډګر اوس وروستی اروپايي هوایې ډګر دی، چې د ډرون الوتکو د لیدو له امله تړل شوی دی.
د راپورونو په اساس، تېره اوونۍ هم ډنمارک کې د څو هوایې ډګرونو په شاوخوا کې د ډرون الوتکو د لیدو له امله لسګونه زره مسافرین اغېزمن شوي وو.
وروسته، ډنمارک د اروپايې مشرانو د غونډې د چمتووالي په خاطر په خپل فضايې حریم کې ټولې ملکي ډرون الوتنې بندې کړې.
