د سوریې د کورنیو چارو وزارت خبر ورکړی چې د دغه هېواد سويل لور ته په سوېدا ښار کې د یو شمېر مذهبي ډلو ترمنځ پخپلمنځي شخړو کې ۳۰ تنه وژل شوي او لسګونه نور ټپیان دي.
د سوریې د بشري حقونو څار ادارې هم دغه پېښه تاید کړې ده خو؛ په دغه جګړه کې د مړو شوو وګړو شمېر یې ډېر ښودلی دی.
د دې ادارې د راپور له مخې په دغه خپلمنځي جګړه کې د روزي ډلې ۲۷ تنه چې دوه ماشومان هم پکې شامل وو وژل شوي او همدارنګه د بادیه نشین ډلې څخه ۱۰ تنه وژل شوي دي.
د سوریې دولتي اژانس " سانا" خبر ورکړی چې د سوېدا او درعا سرحدونو ته امنیتي ځواکونه رسېدلي او په سوېدا کې د زده کوونکو امتحانونه لغوه شوي دي.
باید وویل شي چې له دې جګړې تقریباً درې میاشتې وړاندې د دمشق په جرمانه سیمه کې هم د روزي جنګیالیو او دولتي ځواکونو ترمنځ نښته رامنځته شوې وه چې له امله یې ګڼ شمېر تلفات اوښتي وو.
