کابل (کوه نور، ۲۶ عقرب ۱۴۰۴): روسیې اعلان کړی، چې د شانګهای د همکاریو سازمان غونډه به په مسکو کې جوړه شي.
د روسیې ټاس خبري اژانس نن راپور ورکړی، چې د روسیې لومړی وزیر میخاییل میشوستین به د دغه سازمان د غړو هېوادونو د حکومتونو د مشرانو د غونډې مشري په مسکو کې پر غاړه ولري.
راپور کې راغلي، دا غونډه به تر سبا پورې دوام وکړي او پکې به د سوداګرۍ، اقتصاد، پانګونې، فرهنګي او بشري همکاریو د پراخولو په اړه بحث وشي.
سربېره پر غړو هېوادونو، د شریکو خبرو، ناظر هېوادونو او یو شمېر نورو علاقمندانو هېوادونو لوړپوړي چارواکي هم دې غونډې ته بلل شوي دي.
سرچینې وړاندې لیکلي، همداراز، د شانګهای د همکاریو سازمان غړي هېوادونه به په نړۍوال اقتصادي وضعیت او د SCO چاپېریال په اړه په یوه اعلامیه کې د پرانیستي، عادلانه او مساوي څو اړخیز سوداګریز نظام څخه د خپل واحد دریځ ملاتړ اعلان کړي.
د سرچینې د مالوماتو له مخې لا هم مالومه نه ده، چې د افغان حکومت مسوولان دې غونډې ته بلل شوي که نه.
