کابل (کوه نور، ۵ سنبله ۱۴۰۴):
د فرانسې ولسمشر امانویل ماکرون ویلي، د غزې اشغال، جبري بې کوره کول، لوږه او د لوېدیځي غاړې ضمیمه کول به اسرایلو ته هیڅ ډول بریا ورنه کړای شي.
ماکرون د اسرایلو له لومړي وزیر بنیامین نتنیاهو څخه غوښتي، چې د غزې له بیا اشغال څخه ډډه وکړي او ویلي یې دي، چې د تل پاتې سولې د رامنځته کولو لپاره دي د فلسطین دولت د جوړولو لپاره یوه تاریخي موقع وکاروي.
د امانویل دغه لیک، چې شپږ مخونه یې لرل د نتنیاهو د هغه تندي لهجې د لیک په ځواب کې استول شوی، چې د اګست پر ۲۶ نېټه خپور شوی و.
د اسرایلو لومړي وزیر په هغه لیک کي، چې د اګست پر ۲۶ مه یې خپور کړی و د فرانسې حکومت د فلسطین دولت پر رسمیت پېژندنې له لارې د یهودو ضد کړنو ته لمن وهونکی یاد کړی و.
د فرانسې ولسمشر د لیک په استولو سره د اسرایلو د لومړي وزیر بنیامین نتنیاهو دا تور د ټولې فرانسې لپاره توهین یاد کړی او رد کړی یې دی.
امانویل ماکرون همداراز د فرانسوي یهودانو د ساتنې برخه کې د خپل حکومت له اقداماتو دفاع کړې او ویلي یې دي، چې د اکټوبر پر اوومه د حماس له برید وروسته یې د کنېسو او نورو ټولنیزو مرکزونو د خوندي ساتلو لپاره ۱۵ زره پولیس ځواکونه راټول کړي دي.
