کابل (کوه نور، ۲۱ سنبله ۱۴۰۴): د قطر لومړي وزیر، محمد بن عبدالرحمان ثاني اسرایليان افراطیان بللي او ویلي یې دي، چې هغوی دوحه کې د حماس پر دفتر د برید کولو له امله ټولې پولې او حدود مات کړي دي.
ثاني تېره شپه نیویارک کې د ملګرو ملتونو د امنیت شورا غونډه کې زیاته کړې، چې اسرایل د قطر له ملي حاکمیت سرغړونه کوي او سیمه ییز ملي ثبات یې ګواښلی دی.
نوموړي ژمنه کړې، چې غزه کې د وینې توېیدنې د پای ته رسولو لپاره به خپلې ډیپلوماتیکې هڅې دوامدارې وساتي.
بل پلو د قطر د لومړي وزیر د څرګندونو په ځواب کې د ملګرو ملتونو لپاره د اسراییلو سفیر، ډیني ډانون، ویلي، چې قطر باید حماس وغندي او د هغې غړي عدالت ته راولي.
ډیني ډانون ویلي، چې د اسرایلو جګړه له حماس سره ده؛ نه د غزې له خلکو یا د قطر له حکومت سره.
نوموړي ټینګار کړی، چې اسرایل حق لري د ۲۰۲۳ کال د اکتوبر د اوومې د بریدونو عاملین "هرچیرې چې وي" په نښه کړي.
باید وویل شي، چې په ۲۰۲۳ کال کې د حماس جنګیالیو لخوا پر اسراییلو برید کې نژدې ۱۲۰۰ کسان ووژل او ۲۵۱ نور یې یرغمل کړل.
