د موریتانیا دولتي خبري اژانس د پنجشنبې په ورځ راپور ورکړی چې ۸۹ کډوال د دوشنبې په ورځ د موریتانیا په سواحلو کې د کښتۍ د ډوبېدو له امله مړه شوي دي.
د یاد هېواد ساحل ساتونکو افسرانو ویلي، د یوې پنځه کلنې نجلۍ په ګډون یې نهه کسان ژغورلي او دغه راز یې د ۸۹ کسانو جسدنو موندلي دي.
سرچينې د ژغورل شویو کسانو په حواله ویلي، دغه کښتۍ چې شپږ ورځې وړاندې د ګمبیا – سینیګال له پولې وتلې وه؛ اروپا ته روانه وه او لږ تر لږه ۱۷۰ کډوال پکې سپاره وو.
د یادونې وړ ده چې د لویدیځې افریقا زرګونه کډوال هر کال اروپا ته د رسېدو لپاره د اتلانتیک بحر او مدیترانې بحیرې له خطرناکو لارو تیریږي.
