د روسيې د بريدونو دوام؛ ښايي د ناټو پر کوم غړي هېواد هم حمله وکړي
د مونشن امنيتي کنفرانس مشر وايي، دا نه شي رد کولی چې روسيه دې د ناټو په کوم غړي هېواد حمله وکړي.
کريستوف هوسګن په خپله مرکه کې ويلي، د پوتين موخه د پخواني شوروي اتحاد له سرحدونو هاخوا د لويې روسیې او نړۍوالې امپراتورۍ رامنځته کول دي چې لکه د تزار حکومت وکړي.
هوسګن د دې پوښتنې په ځواب کې چې ولاديمير پوتين به د کومې حملې امر وکړي؟ وايي، "طبعاً، پوتین په وار- وار ویلي چې د پخواني شوروي اتحاد ړنګېدل په شلمه پېړۍ کې تر ټولو لویه غمیزه وه، ځکه د روسیې له سرحدونو دباندې د ډېرو روسانو د لالهاندۍ سبب شوه."
د ده په خبره، که چيرې روسيه په اوکراين کې ماته ونه خوري، ښايي پر مالدوا يا د بالتیک حوزې په نورو جمهوریتونو حمله وکړي.
دا په داسې حال کې ده چې، ټاکل شوې د نړۍ رهبران او متخصصان د فبرورۍ له ۱۶مې تر ۱۸مې يو ځل بيا په دې کنفرانس کې سره راټول شي.
