د ملګرو ملتونو د عالي کمیشنرۍ په یوه راپور کې راغلي چې د نړۍ څه باندې ۱۲۲ میلیونه وکړي د جګړو او طبیعي پېښو له امله د خپلو سیمو پرېښودلو ته اړ شوي دي.
دغه ادارې پخپل کلني راپور کې ویلي چې د جنګونو، طبیعي پېښو، تاوتریخوالي او ځورونو په پایله کې د بې ځایه شوو وګړو شمېرو کې د پام وړ ډېروالی راغلی دی.
راپور کې ویل شوي چې د ۲۰۲۵ کال د اپریل تر وروستیو په نړۍ کې ۱۲۲,۱ میلیون وګړي په جبري توګه د خپلو سیمو پرېښودلو ته اړ شوي دي چې د تېر کال په همدې وخت کې دغه شمېرې ۱۲۰ میلیونه وې.
سرچینې ویلي د کډوالۍ اصلي لامل جګړې دې او په دغه شمېرو کې داخلي بې ځایه شوي هم شامل دي.
بل پلو د ژغورنې نړۍوالې کمېټې په راپور کې راغلي چې په دغه شمېر بې ځایه شوو وګړو کې ۴۰ سلنه یې له ۱۸ کلنۍ کم عمره ماشومان دي.
د دغه ادارې د مالوماتو په اساس د اقلیمي تغیراتو له وجې د داخلي بې ځایه شوو شمېر هم ۴۵,۸ میلیونو ته جګ شوی چې تېر کال دغه شمېر ۲۶,۳ میلیونه و.
باید وویل شي چې د نړۍ له ټولو جبري بې ځایه شوو وګړو دریمه برخه له څلورو جګړه ځپلو هېوادونو سوډان، افغانستان، اوکراین او سوریې څخه جوړېږي.
