کابل (کوه نور، ۲ لیندۍ ۱۴۰۴): د پاکستاني رسنیو د راپورونو له مخې، د پاکستان په لوی ښار کراچۍ کې د هوا کیفیت خورا خراب شوی او د هوا د کیفیت شاخص ۲۲۵ ته رسېدلی، چې دا کچه د انسان روغتیا ته زیان رسوونکې ګڼل کېږي.
د جیوز نیوز په راپور کې راغلي، د نړۍوال چاپېریالي ادارې د وېبپاڼې له مخې، څه موده وړاندې د کراچۍ د هوا کیفیت شاخص ۲۲۵ ثبت شوی، چې دا کچه د ډېرې خرابې او روغتیا ته خطرناکې هوا ښکارندویي کوي.
سرچینې وړاندې لیکلي، د حکومتي چارواکو له هڅو سره سره، د پنجاب د ولایت په هوا کې هم د ککړتیا کچه لا هم لوړه ده.
جیوز نیوز زیاته کړې، لاهور ښار اوس هم د نړۍ د تر ټولو ککړو ښارونو په لېست کې په پنځم نمبر ځای لري، چې هلته د هوا ذراتو اندازه ۱۹۸ ثبت شوې ده.
