ڪابل (کوه نور، ۲۹ لیندۍ ۱۴۰۴): د پاکستان یوې ځانګړې محکمې د یاد هېواد پخواني لومړي وزیر عمران خان او د هغه مېرمن بشرې بي بي ته د فساد په یوه بله قضیه کې هر یوه ته د ۱۷ کاله بند سزا اورولې ده.
د رویټرز په راپور کې راغلي، دا قضیه د قیمتي دولتي سوغاتونو د ارزانه اخیستو او شخصي ګټې لپاره د ناوړه استفادې په تور ده.
د محکمې او عمران خان د وکیلانو پر وینا، دواړه تورنو کسانو د باور ماتونې له امله ۱۰ کاله بند او د اداري فساد ضد قانون له مخې پر ۷ کاله نور بند محکوم شوي او هر یو ۱۶.۴ میلیونه روپۍ جریمه شوي هم دي.
بل پلو عمران خان، چې د ۲۰۲۳ کال له اګست راهیسې بندي دی، دا تورونه رد کړي او وايي دا قضیې سیاسي بڼه لري.
همدارنګه د خان وکیل، رانا مدثر ویلي، عدالت د دفاع خبرې نه دي اورېدلي او یو طرفه پرېکړه یې کړې ده.
باید وویل شي، چې دا نوې سزا د هغو ګڼو قضیو برخه ده، چې د عمران خان پر ضد د هغه له واکه تر لېرې کېدو وروسته ثبت شوې دي.
