د پېښور محکمې د پاکستان له امنیتي بنسټونو غوښتنه کړې چې یاد هېواد کې هغه افغان کډوال چې د پې ار او کارتونه لري له دغه هېواده ونه باسي.
ددغه محکمې په وینا پاکستان کې دغه کارت لرونکي افغانان د جون میاشتې تر ۳۰ مې نېټې د اوسېدلو قانوني حق لري.
وروسته له هغې چې له پاکستانه یو شمېر د پې ار او کارت لرونکي افغانان را وویستل شول د پېښور محکمې له لوري دغه غوښتنه د یاد هېواد له بنسټونو څخه وشوه.
د پاکستانیو رسنیو د مالوماتو له مخې د یاد هېواد حکومت د ۲۰۲۴ کال د جون میاشت کې اعلان کړی و چې ددغه کارت لرونکي افغان کډوال به د ۲۰۲۵ کال د جون میاشتې تر ۳۰ تاریخه له پاکستانه نه ویستل کېږي.
خو بل خوا د پاکستان ډان ورځپاڼې د افغان کډوالو د یوه وکیل له قوله خبر ورکړی چې د پېښور په بېلابېلو سیمو کې د یاد هېواد پولیس او سیمییزې ادارې د پې اوار کارت لرونکي افغانان هم په غیر قانوني ډول نیسي او له هغه هېواده یې بهر کوي.
