د هند د هوایي چلند د پېښو د څېړنې ادارې د شنبې په سهار خپور شوي لومړني راپور کې ویل شوي چې د تېروخت د یوې الوتنې د ټکر پر مهال، د الوتکې د انجنونو د سون توکو کنټرول سویچونه له "چلېدونکي (RUN)" حالت څخه "بند (CUTOFF)" حالت ته اړول شوي وو، چې له امله یې دواړه انجنونه له سون توکو بېبرخې شول.
راپور دا هم څرګندوي چې دواړه پیلوټان د سویچونو د حالت په بدلون ګډوډ شوي وو، او دا ګډوډي د الوتنې لږ وروسته د انجنونو د زور له لاسه ورکولو لامل شوې.
یاده الوتکه چې د "ایر انډیا" شرکت پورې اړه لري او یو بوینګ 787-8 ډریم لاینر و، د جون په 12مه د هند په شمال لوېدیځ ښار احمداباد کې راوغورځېده. په پېښه کې لږ تر لږه 260 کسان وژل شوي، چې له ډلې یې 19 تنه پر ځمکه وو، او یوازې یوه مسافر ژوندي پاتې شوی. دا پېښه د هند د تر ټولو بدمرغه هوایي پېښو له جملې څخه ګڼل کېږي.
الوتکه ټولټال 230 مسافرین لېږدول، چې پکې 169 هندي، 53 برتانوي، 7 پرتګالي، او 1 کاناډایی شامل وو، سربېره پر دې، 12 تنه عمله هم ورسره وه.
د راپور له مخې، د الوتنې له پیل څخه تر سقوط پورې شاوخوا 30 ثانیې وخت تېر شوی. کله چې الوتکې خپله تر ټولو زیاته ثبت شوې تېزۍ ترلاسه کړه، دواړه انجنونه — انجن 1 او انجن 2 — د سون توکو سویچونه یې یو پر بل پسې له RUN څخه CUTOFF ته واوښتل، دا چاره په یوه ثانیه کې ترسره شوې. راپور دا نه دي روښانه کړې چې دا سویچونه ولې یا څنګه د پرواز پر مهال بند شوي.
