کابل (کوه نور، ۸ عقرب ۱۴۰۴): د چین ولسمشر شي جینپینګ د سویلي کوریا په بوسان ښار کې د امریکا له ولسمشر ډونالډ ټرمپ سره د لیدنې پر مهال ویلي، چې د چین او امریکا مذاکره کوونکې ډلې د دواړو هېوادونو ترمنځ د مهمو سوداګریزو او اقتصادي مسایلو د حل لپاره اساسي هوکړې ته رسیدلي دي.
هغه ویلي، د دواړو هېوادونو د سوداګرۍ او اقتصاد ډلې د اندېښنو اړوند کلیدي ستونزو د حل برخه کې اساسي هوکړې ته رسیدلي او د هڅوونکو پرمختګونو شاهدان دي.
شي جینپینګ زیاته کړې، چې چین او امریکا کولی شي یو بل سره د بریا او ګډې ودې تر لاسه کولو لپاره مرسته وکړي.
د هغه پر وینا، کلونه کېږي دا خبره تکراروي، چې چین او امریکا باید شریکان او ملګري وي.
بل پلو د امریکا ولسمشر ډونالډ ټرمپ له دې لیدنې مخکې هیله څرګنده کړې وه، چې دا ناسته به د دواړو هېوادونو ترمنځ د راتلونکې سوداګرۍ لپاره د شرایطو پر سر یوې هوکړې ته لاره هواره کړي.
نوموړي همداراز ویلي، چې غواړي د چینايي توکو پر وارداتو لګول شوې اضافي تعرفې، چې د فینټانیل قاچاق له امله وضع شوې وې، راکمې کړي.
