خبرياله: نازو عمري
روسیې نن اټومي وړتیا لرونکی بالستیک توغندی د اوکراین د لوېدیځ لور ته توغولی، چې څو جنګي سرګلولې لري.
دا برید د هغو پراخو بریدونو یوه برخه ده چې روسیې له ډرونونو او توغندیو سره یوځای پر اوکراین وکړل.
په دغو بریدونو کې شاوخوا ٤ کسان په پلازمېنه کییف کې وژل شوي او ګڼ نور ټپیان شوي دي.
روسیې دا برید د یوه احتمالي ډرون برید په غبرګون کې کړی،چې ګواکې تېر دسمبر د ولسمشر پوتین استوګنځای هدف ګرځولی و؛ خو اوکراین دا ادعا رد کړې او د امریکا استخباراتي ادارې هم دا تور بېاساس بللی وو.
د اوکراین هوايي ځواک خبرداری ورکړی و چې ښايي روسیه د خپل "کاپوستین یار" له نظامي مرکز څخه توغندی توغوي. وروسته تایید شوه چې روسیې یو چټک بالستیک توغندی توغولی دی.
