بلوچ ازادي غوښتونکو د بلوچستان په نوکنډۍ سیمه کې د پاکستان د ايف سي ځواکونو پر مرکز د بريد مسوليت منلی دی.
دغه برید تېره شپه د يوه ځانمرګي په بريد سره پيل شو، چې وروسته شپږ بريدګرو د مرکز دننه له پاکستاني ځواکونو سره جګړه وکړه.
که څه هم نه پاکستاني چارواکو او نه هم بلوچ ازادي غوښتونکو د تلفاتو په اړه څه ويلي، خو ځينو هندي رسنیو د خپلو سرچينو له قوله ليکلي، چې بريد کې ۱۳ پاکستاني پوځيان وژل شوي دي.
دغه برید داسې مهال کيږي، چې ورستیو ۲۴ ساعتونو کې په کوټه او بلوچستان کې ۷ نورې امنيتي پېښې شوي، چې ورسره چارواکو په دغه سيمو کې د امنيتي تدابيرو د سختولو اعلان کړی دی.
دا په داسې حال ده چې څو ورځې وړاندې پېښور کې هم د ايف سي ځواکونو په يوه مرکز برید کې درې پاکستاني سرتیري وژل شوي وو.
