کابل (کوه نور ۲۵ عقرب ۱۴۰۴): د اوکراین ولسمشر ولادیمیر زلنسکي، اعلان کړی، چې د هېواد د لویو دولتي انرژۍ شرکتونو په مشرتابه کې به جوړښتي بدلونونه او مدیریتي بیاکتنې پیل شي.
زلنسکي دا خبره د نوامبر په ۱۵مه، د شنبې په ورځ، پر خپل ټیلیګرام کې کړې او ویلي یې دي، چې له مالي فعالیتونو سره د هممهاله څېړنو ترڅنګ باید د دغو شرکتونو د مشرتابه د بیاکتنې بهیر هم پیل شي.
د اوکراین ولسمشر ټینګار کړی، چې د دولتي اټومي انرژۍ شرکت "انرگواتم" لپاره به نوی نظارتي پلاوی په یوه اونۍ کې جوړ شي او د شرکت ټول مدیريتي غړي به بدل کړل شي.
نوموړي زیاته کړې، چې دغه راز به د دولتي برېښنا تولیدونکي شرکت "اوکرهیدروانرګو"، د ګازو پایپلاین سیستم اپراتور او د انرژۍ ستر شرکت "نفتوګاز" په مدیریت کې هم بدلونونه راشي او د دغو بدلونونو لپاره د داوطلبۍ نېټه ټاکل شوې ده.
زلینسکي دغه پرېکړه وروسته له هغې کړې، چې په اوکراین کې له روسیې سره د جګړې له پیل راهیسې تر ټولو لوی فساد افشا شو، چې له امله یې د یاد هېواد دوه وزیرانو استعفا ورکړه.
باید وویل شي، چې دا اقدام د ولسمشر زلنسکي له خوا د فساد پر ضد د مبارزې او د جګړه ځپلي هېواد لپاره د بهرنیو مرستو د خنډ د مخنیوي هڅه ګڼل کېږي.
