د اوکراين ولسمشر ولادیمیر زلينسکي د امريکا د نويو پوځي مرستو د طرحې د تصويب هرکلی کړی او د امريکا د استازو جرګې له مشر مايک جانسن په ګډون يې له هغو کسانو مننه کړې چې د مرستو د تصويب ملاتړ کوي.
هغه ويلي، دغه مرستې به د زرګونو اوکرايني وګړو د خونديتوب او ژوند ژغورنې لامل شي.
زلينسکي هيله ښودلې چې ياده طرحه به ډېر ژر د امريکا استازو جرګه کې تصويب او ولسمشر جو بايډن ته د لاسليک لپاره واستول شي.
د دغو پوځي امريکايي مرستو اندازه ۹۵ ميليارده ډالره ده چې پهکې ۶۰ ميليارده ډالره د اوکراين، ۲۶ ميليارده ډالره د اسراييل، څه باندې ۹ ميليارده ډالره د غزې او سوډان د بشرپالنې او ۸٫۱۲ ميليارده ډالره د سيمې، هند، ارام سمندر او تايوان د امنيت د ټينګښت لپاره ځانګړې شوې دي.
د امريکا ولسمشر جو بايډن هم د طرحې د ژر تر ژره تصویب او هغه ته د استولو غوښتنه کړې ده.
ټاکل شوې، راتلونکې اونۍ د امريکا په استازو جرګه کې د پوځي مرستو دغه طرحه تصويب شي.
