کابل (کوه نور، ۳۱ اسد ۱۴۰۴):
کېیف ویلي، د روسیې د بریدونو پر دوام له خپلو متحدینو د سولې په تړون کې د امنیتي تضمینونو د چټک پرمختګ طمع لرو.
د اوکراین ولسمشر ولاديمير زلینسکي د امریکا او اروپا له پوځي چارواکو غوښتنه کړې چې د خبرو اترو د پیل لپاره وړاندیز شوي پلانونه ژر ژر چمتو کړي.
زلینسکي پرون له خبریالانو سره په خبرو کې ویلي چې لا هم د روسیې لخوا داسې کومه نښه نشته چې دوی رښتیا په خبرو کې ګډون کول او د جګړې پای ته رسول غواړي.
هغه له خپلو متحدینو دا غوښتنې وروسته له هغې کړې چې د روسیې لخوا د اوکراین په څو سیمو کې تازه ۵۷۴ ډرونه او ۴۰ توغندي توغول شوي دي چې پکې د ملکیانو د ټپې کېدو سربېره استوګنځایونو او زېربناوو ته د پام وړ زيان اوښتی دی.
همدارنګه په موکاچیو کې د امریکا پر ملکیت یوه دولتي فابریکه هم برید شوی چې د اوکراین په لوېدیځ سرحدي زاکارپاتیا سیمه کې موقیعیت لري.
د اوکرایني چارواکو پر وینا، دا برید د دې میاشتې تر ټولو لوی هوایې برید و چې د ټرمپ او پوتین ترمنځ د اوکراین لپاره د سولې راوستلو له خبرو څو ورځې وروسته ترسره شو.
په همدې حال کې د روسیې د بهرنیو چارو وزیر سرګي لاوروف ویلي، اوکراین باید غیر پوځي شي او له لوېدیځ سره د یوځای کېدو هڅه دي نه کوي.
لاوروف ویلي، د روسیې ولسمشر او زلینسکي هغه مهال سره کتلی شي چې اوکراین غیر جنوبي، غیر اتومي او غیر متحد پاتې شي.
نوموړي همداراز کېیف او د هغه متحد د ټرمپ د سولې د هڅو ناکامولو تورن یاد کړي دي.
