ڪابل (ڪوه نور، ۶ جدي ۱۴۰۴): د اوکراین ولسمشر ولادیمیر زلینسکي ویلي، روسیه د بلاروس له خاورې څخه د اوکراين پر هدفونو بریدونه کوي او هڅه کوي چې د کیف د دفاعي کرښو چاپېره ځان تېر کړي.
نوموړي زیاته کړې، روسان د بلاروس په پولو ته نږدې مېشتو ښارګوټو کې د عامو اوسېدونکو د اپارتمانونو بامونه کاروي، هلته یې انټنونه او نور تجهیزات لګولي، چې د "شاهېد" ډرونونو لپاره د هدف ټاکلو وسیلې ګرځېدلې دي.
هغه ویلي، د روسانو دا کار د انساني ژوند له ارزښت سره ښکاره سپکاوی دی او هیله یې ښودلې، چې مینسک له دا ډول لوبو لاس واخلي.
د زلینسکي پر وینا، سره له دې چې د بلاروس ولسمشر الکساندر لوکاشینکو ژمنه کړې، چې جګړې ته به خپل پوځیان نه استوي؛ خو د ۲۰۲۲م کال د فبرورۍ د یرغل پر مهال یې روسیې ته اجازه ورکړه، چې له بلاروس څخه بریدونه پیل کړي او تر اوسه هم د روسیې نږدې ملګری پاتې شوی دی.
زلینسکي دا کار د بلاروس د خپلواکۍ پر ضد اقدام بللی او خبرداری یې ورکړی، چې دا کار د بلاروس لپاره هم خطرناک دی.
