د اوکراین ولسمشر ولادیمیر زيلنسکي پر اېکس ليکلي، پر روسيې بنديزونه نه لګول، دغه هېواد ته دا پیغام ورکوي، چې د اوکراین پر وړاندې دې جګړه روانه وساتي.
هغه زياته کړې، تېره يوه اوونۍ د روسيې له لوري پر دغه هېواد دوه زره او ۳۶۰ بريدونه شوي، چې ډیرې هغه یې د هدایت شوي بمونو او توغنديو په واسطه وو.
نوموړي دغه راز نيوکه کړې، چې د روسيې د تېلو لپاره هر ورکړل شوی ډالر د اوکراین خلاف جګړې ته پيسې ورکول دي.
زيلنسکي زياته کړې، اوسمهال د روسيې د لس ميليارده ډالرو په ارزښت ټېل سمندر کې بار دي، چې دغه پيسې په مستقیم ډول د اوکراین پر ضد بريدونو کې کارول کيږي.
نوموړی دغه څرګندونې وروسته له هغې کوي، چې امريکا د روسيې په تېلو بنديز معاف کړ او دغه چاره يې د انرژي د بازار د ثبات لپاره مهمه وبلله.
زيلنسکي دغه راز له هغه هېوادونو مننه کړې، چې پر روسيې د جګړې د پای ته رسولو يا کمولو فشار اچوي.
