د اوکراین ولسمشر ولادیمیر زیلینسکي ویلي، روسیې تېره شپه پر اوکراین له ۷۰ څخه ډېر توغندي، چې نږدې نیمایي یې بالستیک توغندي وو او نږدې ۵۰۰ بریدګرې بېپیلوټه الوتکې، چې د جېټ انجن لرونکي «شاهد» ډرونونه هم پکې شامل وو، توغولي دي
د هغه په وینا، په دغو بریدونو کې ۱۳ کسان وژل شوي او له ۹۰ څخه ډېر نور ټپیان شوي دي.
زیلینسکي زیاته کړې، چې د کییف ښار کې ۲۰ بېلابېلو ځایونو په نښه شوی، چې ډېری زیانونه د عامو خلکو استوګنیزو ودانیو ته رسېدلي او د امبولانس یو تمځای، یو علمي څېړنیز انسټیټیوټ، یو هوټل او یو شمېر سوداګریز مرکزونه هم زیانمن شوي دي.
هغه ویلي، د اوکراین هوايي دفاعي ځواکونو د روسیې د توغندیو او بېپیلوټه الوتکو یوه وړه برخه شنډه کړې هم ده.
نوموړي له خپلو نړیوالو شریکانو وغوښتل چې د PURL پروګرام ملاتړ وکړي، او زیاته یې کړه، چې لا هم د امریکا له لوري د پاتریوټ هوايي دفاعي سیسټم د جوازونو او د بالستیک توغندیو ضد وسلو د ګډ تولید په اړه پرېکړې ته په تمه دی.
