کابل (کوه نور، ۲۹ عقرب ۱۴۰۴): د امریکا د استازو جرګې پرون ورځ په یوه خوله هغه ماده لغوه کړې، چې د حکومت د تمویل په قانون کې ور اضافه شوې وه او له مخې یې سناتورانو ته اجازه ورکول شوې وه، چې که د دوی تیلیفونونه پرته له خبرتیا وڅېړل شي، نو حکومت ته دې دعوه وکړي.
د سنا د اکثریت مشر جان تون د چهارشنبې په سهار نه ده څرګنده کړې، چې که چېرې دا ماده د استازو جرګې لهخوا لیرې شي سنا به څه ډول اقدام کوي.
د ABC News د راپور له مخې، دغه ماده د جان تون په غوښتنه د حکومت د ستر تمویلي قانون برخه شوې وه، هغه قانون، چې تېره اونۍ کانګرس تصویب او ولسمشر لاسلیک کړی و.
راپور کې راغلي، اوس دیموکراتانو یوه قانوني لایحه وړاندې کړې، چې غواړي دا ماده له بودیجوي قانونه وباسي، هغه ماده، چې سناتورانو ته د خپلو تیلیفوني اسنادو د څېړنو پر ضد د دعوې حق ورکوي.
سرچینې وړاندې لیکلي، چې تون د دې مادې دفاع کړې او دا یې نه ده روښانه کړې، چې که سنا ته دا لایحه ورسېږي، دی به څه ډول اقدام کوي.
