کابل (کوه نور، ۳۱ اسد ۱۴۰۴): د متحده ایالاتو د مرکزي قوماندانۍ "سنتکام" ځواکونو د اګست پر ۱۹مه نېټه په شمالي سوریه کې د داعش یو لوړپوړی غړی او د دې ډلې مهم مالي مسئول وژلی دی.
یاد غړی د سوریې او عراق لپاره د بریدونو د پلان کولو مسئول و او د داعش له بېلابېلو شبکو سره یې اړیکې لرلې.
له همدې امله هغه د امریکا ائتلاف او د نوي سوریې حکومت لپاره یو مستقیم ګواښ ګڼل شوی و.
د سنتکام قوماندان، ادمیرال برډ کوپر په دې اړه ویلي: «موږ په ټینګ هوډ سره په داعش ترهګرو پسې په ټوله سیمه کې ګرځو. سنتکام د خپلو شریکانو او متحدینو ترڅنګ، د داعش د بشپړو ماتولو او د متحده ایالاتو د خاورې د ساتنې په ژمنه ولاړ دی.»
