د نړۍوالو رسنیو د راپورنو په اساس حماس غورځنګ غزې ته د لېږدېدونکو توکو د غلا په تور څلور تنه نیولي او د اعدام سزا یې ورکړې ده.
د رویټرز خبر اژانس د راپور له مخې دغه څلور تنو اعدام شوو وګړو په هغه پېښه کې هم لاس درلود چې د اسرایلو له خوا پکې شپږ امنیتي چارواکي وژل شوي وو.
یاد امینیتي چارواکي د اسرایلو د تېرې ورځې په بمباریو کې هغه مهال وژل شوي وو چې هڅه یې کوله د مرستو بار لارۍ له غلو څخه وژغوري چې په پایله کې یې خپل ژوند له لاسه ورکړ.
په همدې حال کې د غزې د مقاومت ډلې خبر ورکړی چې اووه تنه نور شکمن کسان یې هم تر څارنې لاندې نیولي دي.
د نړۍوالې لوږې یوې څارونکې ډلې خبر ورکړی چې پر اسرایلو له فشارونو ډېرولو وروسته غزې ته د مرستو لړۍ تېره اوونۍ پیل شوې ده.
مرستندویه ډلو ویلي د لوټماریو له امله د مرستو رسولو پروسه له ستونزو سره مخ شوې ده خو دوی اسرایل ملامت کړي چې د دا ډول حالت په رامنځته کولو سره یې سلګونه زره خلک د بندیزونو له امله ناهیلۍ ته اړ کړي دي.
