د فرانسې ولسمشر امانويل ماکرون پر اېکس ليکلي، هېواد به يې تر هر هغه وخته چې، اوکراين اړتيا ولري، ترې ملاتړ وکړي.
نوموړي دغه څرګندونې وروسته له هغې کړي، چې روسيې په خارکييف کې د عامه خلکو پر يوه لېږدوونکي اورګاډي بريد وکړ.
ماکرون د روسيې له لوري د اوکراين د زیربناوو په نښه کول هم غندلي دي.
نوموړي زياته کړې، له خپل اوکرایني سیال سره يې ټيليفوني خبرې کړې او د «G_7» هېوادونو له غونډې وروسته به فرانسه اوکراين ته ژمنۍ مرستې ولېږي.
هغه همداراز لیکلي، پاريس پر مسکو د فشار راوړلو په هڅه کې دی او دغه راز اروپايي ټولنه هم پر روسيې د نويو بنديزونو هڅه کوي.
